<新報>乙組黃大仙傳與恒大拍住上

雖然下年職業聯賽會搞成點仍然未知，而且職業牌照亦有好多問題需要解決。不過傳言已經有一支準備挑戰新頂級聯賽嘅球隊，可能會同廣州恒大合作，若然成事可能會令到香港又多一隊富豪球會出現。


據報而家喺乙組排榜首嘅黃大仙，佢哋老闆同恒大集團老闆許家印相當熟悉，故此今年呢隊波一直希望爭取升班，希望能夠參加下季嘅職業聯賽。雖然佢哋搵恒大支持其實只係一個初步構思，因為一切都要睇大家開出嚟嘅條件，所以最後可能只係吹水都話唔埋。不過佢哋好可能都會同恒大有其他合作，當中包括引援之類，甚至下季季初可能會去恒大嗰到集訓都唔定。

不過聽聞佢哋本身都已經有所準備，所以即使冇恒大呢支大水喉，要搵600萬左右嘅班費都唔會係問題。但係香港足總同一班香港人咁憎所謂嘅大陸資金，若然恒大支持黃大仙，唔知會唔會出現反對聲音呢？

<新報體育>